Martir për të shenjtën liri të votës

Nga Besim Ndregjoni*.

Në këto vite demokraci vendi ka njohur sfida dhe vuajtje të shumta. Në këtë rrugëtim të vështirë ka pasur idealistë dhe luftëtarë që dhanë gjithçka. Ndregjoni shkruan për Kujtim Frangun, i cili 19 vjet më parë u vra në mbrojtje të votës së lirë.

Në këtë periudhë 25-vjeçare të ndërrimit të sistemit politik kam organizuar dhe përkujtuar shumë figura të shquara antikomuniste të cilat kanë lënë gjurmët e tyre në historinë tonë kombëtare.  Në mes të këtyre martirëve sot mbas 19 vitesh kujtojmë me respekt dhe venerim Martirin e votës së lirë Kujtim Tofik Frangun. U mbushën 19 vite që çdo fillim të korrikut si vit shënues të kujtojmë ty Kujtim. Korrik 1977 vriten poetët e Librazhdit Vilson Blloshmi, dhe Genc Leka, për poezitë e tyre në mbrojtje të lirisë.  Diktatura i vrau  në korrik se tronditej nga “Saharaja” shqiptare që kishte ndërtuar pushteti i tyre. Heronjtë  dhe martirët paskan të përbashkët jo vetëm  idealet dhe lirinë por dhe vdekjen.

20 vite më pas në vitin e zi 1997 falangat e  ideologjisë komuniste që nuk iu nënshtruan gjykimit për krimet e kryera të diktaturës vranë në qendrën e votimit mbrojtësin e votës së lirë, idealistin e lirisë, birin e të burgosurit politik Kujtim Frangun, vetëm se ai nuk pranoi të cenohet vota e lirë. Ai votën e quante të shenjtë, të paprekshme, kurse pala vrasëse donte pushtetin me tjetërsimin dhe cenimin e votës. Ajo donte sundimin ideologjik dhe politik pa votë të lirë. Historia përsëritet, i njëjti plumb që vrau poetët, i njëjti plumb vrau mbrojtësin e votës së lirë.

Kujtim,  të  kujtova ty, se ti je nga ata emra  që për lavdi s’do t’ia dish kur jeta  mbillet nëpër zemra me bekim perëndish.
Sot të kujtova ty, si një emblemë e gjallë e historisë së re, e kësaj historie që dhemb. Pikat e referimit  nuk kanë të sosur  në këtë 19-vjetor të vrasjes tënde. Populli një armë ka në dorë, Votën e lirë dhe verdiktin, të cilin ti e mbrojte me jetën tënde.

Ti ishe i përndjekur politik, por me dinjitet, jetove 42 vite, por jeta jote nuk matet me vite që jetove por me kualitetet njerëzore që e përballove atë jetë.
Jeton pak dhe bën shumë, e tillë ishte jeta e martirit të votës së lirë Kujtim Frangu.

Ai përçonte  “Mirësi” dhe kjo i buronte nga vuajtjet  që kishte kaluar në sistemin diktatorial. Motoja e tij ishte “Të falim ne, që të pendohen të tjerët. Me urrejtje nuk shkohet larg… I sakrificës për të tjerë deri në vetëflijim. Përjetuesi i viteve të burgut të babait të tij Tofik Frangu që vuajti jo pak por dhjetëra vite, vetëm se ishte fisnik dhe nacionalist dhe s’pranonte diktatin e krimit komunist. Kujtim Frangu e kuptonte demokracinë  me thënien e ish-presidentit Abraham Linkoln, aq sa nuk dua të jem skllav, po aq nuk dua të jem zotëri. Gjithçka që nuk përputhet  me këtë koncept, bie në kundërshtim me demokracinë. Kjo shprehje kuptimplotë përputhet me  idealizmin  dhe përkushtimin e Kujtim Frangut dhe e karakterizon  jo vetëm tërë veprimtarinë e jetës së tij por,  dhe si komisioner i votës së lirë për të cilën dha jetën i goditur me plumb nga një dorë gjakatare, ditë e zgjedhjeve  për deputetë të Kuvendit të Shqipërisë në vitin 1997. Vdekja tregon se ç’njeri ke qenë, thotë populli. Vdekjet më të bukura  janë si ajo e Kujtim Frangut. Të biesh hero nga plumbi për një ideal të lartë, për lirinë e njeriut, për  të drejtën e votës së lirë në demokraci.  Zoti kur don, të shpërblen dhe me vdekjen.

Presidenti i Republikës së Shqipërisë Alfred Moisiu, me dekretin  Nr. 4984 dt. 20.07.2005 e ka dekoruar Kujtim Frangun “Për merita të veçanta civile, me motivacionin ‘Për kontributin e dhënë, duke sakrifikuar dhe jetën në zhvillimet demokratike në mbrojtjen e votës së lirë’”

Komisioni shtetëror i Këshillit të Ministrave me vendimin Nr. 19 dt. 12.07 1998  e ka shpallur Dëshmori i Atdheut me motivacionin: Rënien në krye të detyrës si komisionar  në Komisionin e Votimit

Sot të kujtova ty në këtë korrik të verdhëremë dhe u  ndjeva i rëndësishëm duke marrë nga imazhi yt. Sepse kujtesa  për ty është  një obligim për të dashur  më shumë lirinë, të cilën ti na e mësove pak më shumë, duke vaditur rrënjët e saj me gjakun e rinisë tënde.

 

*President i Unionit Mbarëkombëtar të të Përndjekurve Politikë

Burimi: Mapo.al

Postime të ngjashme